પગ બ્રહ્માના

અમે તો પગ ભ્રહ્માના.

યુગોથી બસ ચાલતા રહ્યા કશુંક શોધતા,

ત્યારેપૃથ્વી નહોતી, સૂર્ય નહોતો.

હાઈડ્રોજનના બળબળતા દરિયામાં

અમે ચાલતા રહ્યા.

પૃથ્વીનો જન્મ થયો ,

ત્યારે અમે અવતરણ કર્યું તેની લાવારસથી

ખદબદતી શિલાઓ પર.

કેટકેટલાં લોહી અને લાવારસના દરિયા

અમે ખૂન્દ્યા.

કુરુક્ષેત્ર-ટ્રોય-કલિંગ-હિરોશીમા-નાગાસાકી,

કેટલાં શબ અમે ઢસરડીને લઇ ગયા

ગીધભૂમિમાં.

તોય હજીયે ચાલતા રહ્યા .

કેમકે ખૂટતો નથી આ લોહીમાંસથી

લથબથતો વિરાટ રસ્તો,

અમે તો પગ બ્રહ્માના

યુગોથી બસ ચાલતા રહ્યા કશુંક શોધતા.