ઈચ્છા

અમને એમ ન થાય

કે

અમારું પણ એક ગામ હોય,

નેએની બજાર વચાળે

માથું ટટ્ટાર રાખી હેંડતા જઈએ?

અમને એમ ન થાય કે

અમારો પણ એક વીરડો હોય

સૌની સાથે

છાલિયું લઇ ખાડો ખોદી

માટલું ભરતાં જઈએ,

હૈયું છલકાવતાં પાણિયારે જઈએ?

અમને એમ ન થાય,

 કે –

અમારે પણ ગામસીમાડે જમીન હોય?

અખાત્રીજના સપરમે દા’ડે

હળબળદ લઇ ઘૂઘરા રણકાવતા

ખેતરે જઈએ.

અમને એમ ન થાય કે

અમારે પણ

એક પાકું ઘર હોય

આભલું ચોધાર વરસતું હોય

અને અમે

હોકલી પીતા ખાટલે સૂતા હોઈએ.