સૂર્યોદયની પ્રતીક્ષા

સૂર્યોદયની પ્રતીક્ષા કરવી અઘરી છે.

જ્યારે ઘોર અંધકાર અરણ્યોમાં વ્યાપ્યો હોય

અને આખું આકાશ

વાદળથી ઘનઘોર હોય

ત્યારે  ફક્ત એકલા જ

કપરાં ચઢાણ ચઢી પહાડની ઊંચી ટોચ પર જવું પડે.

મેઘલી રાતે મદિરા પીને સૂતેલા દરિયાને

તમારે  ઢંઢોળવો પડે,

નિદ્રાધીન થયેલાં વ્રુક્ષોને હચમચાવવાં પડે ,

એક એક પંખીના માળે જઈને

જગાડવાં પડે તેમને,

બીડાઈ ગયેલાં ફૂલોને પંપાળી વિકસાવવાં પડે

ત્યાં સુધી

થોડો ઉજાસ થાય ,

સશસ્ત્ર ચોકિયાતો જેવા થોડા તારા દૂર થાય .

સૂર્યજન્મની પ્રસૂતિની પીડા

તમારે ધીરજથી વેઠવી  જોઈએ.

સમગ્ર અવકાશને ઝળહળ પ્રકાશથી ભરવા

સૂર્યનો જન્મ

સહેલાઈથી તો ન થાય ,

પીડાથી તસતસતી પૃથ્વીને

પ્રેમથી બે શબ્દ કહેવા પડે.

સૂર્યોદયની પ્રતીક્ષા કરવી અઘરી છે.