અમે

હા, તમારી વાત સાચી.

એ લોકો પણ ગરીબ હોય છે.

લોકના દળણાં દળે છે .

પાણી ભરે છે,

વાસણ માંજે છે,

રસોઈ રાંધે છે ,

ખેતરમાં –ખાણમાં

મિલમાં – મશીનમાં

પસીનો પાડે છે .

પણ તેને મળે છે સ્નેહ-

અમને તિરસ્કાર ,

તેમને મળે છે આદર,

અમને અપમાન.

તેમને મળે છે દયા-

અમને ધિક્કાર.

તેઓ પાણિયારેથી પાણી પીએ છે ,

અમે ઊભા રહીએ છીએ

ઘરબહાર .

એમને મળે છે દાન,

અમને ભીખ.

હા,તમારી વાત સાચી-

એ લોકો પણ ગરીબ હોય છે.

પણ અમારો પ્રશ્ન જુદો છે.

ઇતિહાસમાં ક્યાંય એનો જોટો મળવો મુશ્કેલ છે.

અમે નથી કેવળ કાળા.

અમે નથી વિધર્મી.

અમે નથી કેવળ શ્રમજીવી.

અમે અમે જ છીએ –

વેદકાળથી તિરસ્કાર સાથે અત્યાચાર સહેતી

વિશ્વની  એક માત્ર માનવ પશુજાતિ.